Македонија е во постојан дијалог со институциите во Брисел и
земјите-членки во однос на европската интеграција на земјата, која во моментов
е во застој поради неисполнетиот услов за измени на Уставот, а целта е „да се
најде решение кое ќе го направи евроинтеграцискиот процес предвидлив“, изјави
министерот за надворешни работи и надворешна трговија, Тимчо Муцунски, во
емисијата „Топ тема“.
„Сметаме дека најбезбеден начин за спроведување на оваа
предвидливост е да се одложи спроведувањето на уставните измени, но кажавме
дека доколку ЕУ има друго решение, подготвени сме да разговараме, да се
консултираме и со опозицијата и со јавноста. Не само чувството, туку и
информацијата што ја имаме е дека доколку продолжиме по патот што го зацрта
францускиот предлог (рамката за преговори) тоа би било сериозен предизвик за
нас и се сомневаме дека наскоро може да се најдеме на почетна точка. Нашата
крајна цел не е компромис по секоја цена, туку компромис кој води кон
предвидливост, а компромисот од наша страна се измени на Уставот“, рече
Муцунски.
Според неговите зборови, Македонија е многу над европските
критериуми за човекови права и кога ЕУ инсистира Бугарите да бидат вклучени во
уставот, во контекст на човековите права, аргументот на Македонија е дека
„соседот што го очекува ова, самиот не го исполнува, како и минималниот праг на
права што се очекува од држава што ја ратификувала Европската конвенција за
човекови права“.
Муцунски изјави дека компромисно решение за прашањето за
уставните измени мора да се постигне со политичка влада во Бугарија, „која ќе
има целосен политички легитимитет“ да го спроведе она што ќе биде договорено.
„Мораме да се бориме, но и да бидеме свесни за нашите силни
страни – стратешката позиција на нашата земја и фактот дека Европската унија не
може да си дозволи уште една грешка во однос на нашата интеграција. Нашиот
пристап е да бидеме најдобра влада пред граѓаните, но и во очите на нашите
европски партнери во однос на спроведените реформи и усогласеноста со
заедничката безбедносна политика на ЕУ. Сакаме Европската Унија да каже: „Ова е
владата што прави реформи“, но во исто време да најде рационално решение со
Бугарија што ќе обезбеди за шест месеци да не се вратиме во ситуација во која
тие повторно ќе најде причини да ги блокира нашите евроинтеграции“, рече
Муцунски.
Тој гледа позитивни тонови во реториката во Брисел, која
„покрај исполнувањето на условот за уставни измени, вклучува и дијалог и
изнаоѓање рационални решенија“, што, според него, го постигнала токму владата
во Скопје.
„Нема сила што може да ме убеди дека Софија не може да се
убеди. ЕУ, заедно со нас, мора да разговара со Софија. Таа прави историска
грешка и голем дел од народот во Софија го разбира тоа. Тие прават грешка од
гледна точка на економијата и трговијата. Нема земја која ни е поважна да одиме
напред кон ЕУ. Со постојаното враќање на фактот дека мора да ја негираме нашата
историја и идентитет, тие создаваат сериозна омраза кај помладите генерации“,
рече Муцински.
