Седум од деветте судии гласаа за отфрлање на барањето, а случајот пред Врховниот суд беше покренат по итно барање од адвокати на група венецуелски мажи обвинети за членство во банди, што администрацијата на Трамп тврди дека ги квалификува за итно отстранување од САД според Законот за странци-непријатели од 1798 година.
Судиите Самуел Алито и Кларенс Томас го поддржаа барањето на администрацијата на Трамп.
Врховниот суд претходно привремено ги запре депортациите од притворскиот центар во северен Тексас, а таа наредба беше издадена минатиот месец - среде ноќ.
Случајот со Венецуелците е само еден од неколкуте што завршија на суд, откако Трамп во март го прогласи нарко-картелот Трен де Арагва за странска терористичка организација и последователно побара неговите членови да бидат протерани од САД според законот од 1798 година.
Врховниот суд се фокусираше на правото на луѓето да ја оспорат својата депортација и не се осврна на тоа дали повикувањето на законот од 18 век од страна на Трамп било соодветно. Тој, исто така, јасно стави до знаење дека не ги оспорува другите начини на депортација на владата.
Најмалку тројца федерални судии утврдија дека Трамп неосновано посегнал по законот за да ги забрза депортациите на луѓе што неговата администрација ги идентификувала како членови на венецуелската банда Трен де Арагва. Од друга страна, еден судија од Пенсилванија ја одобри примената на тој закон во такви случаи.
Различниот пристап на федералните судии произлегува од друга одлука на Врховниот суд во која се вели дека притворениците кои сакаат да ги оспорат своите депортации мора да го сторат тоа од местото каде што се притворени и дека мора да им се даде „разумен рок“ да поднесат жалба.
Меѓутоа, Врховниот суд не го прецизираше тој „разумен рок“ и ја отфрли употребата на рокот од 12 часа на кој инсистираше американската Влада.
© Vecer.mk, правата за текстот се на редакцијата
