ШЕЈН ПРАКТИКУВА ЛАЖНИ ПОПУСТИ: Што друго открива истрагата на Европската комисија за кинескиот е-трговец

Добивај вести на Viber

Европската комисија денеска соопшти дека го известила сајтот за е-трговија на мало Шејн дека е утврдено оти голем број негови практики се во спротивност на Законот за потрошувачи на ЕУ.

Кршењето на законската регулатива на ЕУ е утврдена во заедничка истрага на Европската комисија, Мрежата за соработка за заштита на потрошувачите и надлежните истражни органи на Белгија, Ирска, Франција и Холандија.

Истрагата утврдила дека Шејн практикува т.н. „лажни попусти“, односно пласира неточни информации за намалување на цените на одредени производи, дека најавува лажни рокови за траење на акции со што врши притисок врз потрошувачите да се решат да купат некои артикли, ги мами клиентите со неточни карактеристики на стоките што ги нуди на продажба и дава неточни и манипулирачки информации околу можностите за враќање на нарачаните производи и повратот на средства.

Паралелно со оваа, ЕК води истрага против Шејн и за усогласеност со Законот за дигитални услуги (ДСА) во делот на заштита на потрошувачите од ЕУ и нивните права.

Шејн сега има рок од еден месец да одговори на наодите од истрагата и да предложи мерки за отстранување на утврдените неправилности поврзани со потрошувачките права. Доколку чекорите преземени од страна на сајтот бидат оцените како незадоволителни, можно е да му бидат изречени мерки од страна на ЕК или надлежните власи, кои можат да вклучат и парични казни во висина од одреден процент од вкупниот годишен обрт на Шејн во засегнатите земји членки на ЕУ.