Адмирал на НАТО: САД нема да го напуштат НАТО, но може да се повлечат од Европа

САД веројатно ќе ја задржат својата посветеност на НАТО, иако може да го намалат присуството на војници во Европа бидејќи нивните приоритети се префрлаат на индопацифичкиот регион, рече висок претставник на Алијансата.

Адмиралот Џузепе Каво Драгоне, кој минатиот месец ја презеде функцијата претседавач со Воениот комитет на Северноатлантскиот сојуз, зборуваше на маргините на Минхенската безбедносна конференција, каде што европските лидери разговараа со новата администрација на претседателот Доналд Трамп, вклучувајќи ги и изгледите за слабеење на безбедносната заштита од страна на САД.

„САД нема да се повлечат од НАТО“, рече Каво Драгоне, италијански поморски офицер, во интервју во Минхен. „Но повлекувањето на дел од 100.000 војници стационирани во Европа би можело да биде на дневен ред поради некои обврски што САД ги имаат далеку одовде, во Пацификот“, рече тој. „Сепак, мислам дека нема да има огромен број Американци што ќе си отидат од Европа“, рече адмиралот.

Каво Драгоне, италијански поморски офицер Bloomberg Mercury

Министерството за одбрана на САД не одговори на барањето за коментар.

Европската безбедност беше најважна тема на собирот во главниот град на Баварија, особено прашањето како да се реши тригодишната руска војна против Украина. Европските и украинските лидери беа затекнати од планот на Трамп да се сретне со претседателот Владимир Путин.

Каво Драгоне се приклучи кон мноштвото членки на НАТО во Европа, повикувајќи на зголемени трошоци за одбрана, признавајќи дека промената на приоритетите на САД значи дека континентот треба да ја зајакне нивната воена сила.

„Постои еден вид нерамнотежа, така што треба повторно да воспоставиме баланс“, рече адмиралот, нарекувајќи ја идејата дека Европа не е во состојба да се одбрани како „богохулие“.

„Секое американско повлекување од Европа мора да биде прифатено од НАТО со оперативен став“, рече Каво Драгоне, додавајќи дека војските во регионот треба да бидат способни да ја пополнат празнината.

Европа треба брзо да ги зголеми трошоците за одбрана за да се справи со руската инвазија во Украина, изјави литванската министерка за одбрана Довиле Сакалиен.

„Треба брзо и многу да трошиме на одбраната, и тоа уште веднаш треба да се потрошат дури стотици милијарди“, рече Сакалиен во интервју за ТВ „Блумберг“.

Сакалиен зборуваше пред состанокот на европските лидери во Париз, откако францускиот претседател Емануел Макрон повика на итни разговори за Украина и за безбедноста на блокот. Разговорите доаѓаат во време кога американските и руските претставници треба да се сретнат во Саудиска Арабија во наредните денови за да започнат преговори за ставање крај на руската инвазија на Украина.

Европските власти работат на нов голем пакет за зголемување на трошоците за одбрана и поддршка на Киев додека претседателот Доналд Трамп се залага за брз крај на војната во Украина. Сакалиен рече дека сè уште се работи на деталите од планот и одби да зборува повеќе, додавајќи дека ЕУ „гради брод на кој ние веќе пловиме“.

„Сознанието дека САД нема да ја бранат Европа, туку Европа ќе се брани сама со помош на САД, драматично ќе ја промени безбедносната средина на Европа. Тоа значи дека сите ќе треба брзо да дејствуваме, вклучувајќи ја и Германија“, рече таа.

 

Во моментов нема коментари за веста. Биди прв да коментира...

Остави коментар