Колку вежбање е потребно за да „компензираме“ за тоа што седиме речиси цел ден пред компјутер?
Седењето со часови пред компјутер знаеме дека е штетно за здравјето – но колку физичка активност е доволна за да се ублажат последиците?
Според истражување објавено во British Journal of Sports Medicine, околу 30 до 40 минути умерено до интензивно движење дневно може да ги поништи штетните ефекти од 10-часовно седење. Вежби како брзо одење, возење велосипед или правење нешто во градината значително го намалуваат ризикот од прерана смрт кај лица со седечки стил на живот.
Што покажаа истражувањата?
Овие сознанија се резултат на мета-анализа од 2020 година, која опфатила 9 студии со над 44.000 луѓе од четири земји. Учесниците носеле уреди за следење на активноста, што ги прави резултатите посигурни отколку истражувањата базирани на само извештаи.
Истражувачите велат дека дури и мали активности — качување по скали, играње со деца или домашни миленици, танцување, или домашни обврски — се подобри од ништо. Светската здравствена организација (СЗО) ги поддржува овие препораки, советувајќи 150 до 300 минути умерена или 75 до 150 минути интензивна физичка активност неделно.
Иако сè уште не се знае точно колку е „премногу седење“, експертите велат дека и кратките прекини во седењето и малите движења се важни. Истражувањето покажува дека секој чекор брои — и дека никогаш не е доцна да се почне, дури и со 5 минути дневно.
Коментирај анонимно