Свет
Трамп рече дека Путин полудел, стигна одговор од Кремљ

Кремљ изјави дека тврдењето на американскиот претседател Доналд Трамп дека Владимир Путин потполно полудел може да биде резултат на емоционално преоптоварување, но му се заблагодари на американскиот лидер за помошта во почнувањето мировни преговори за Украина.
Трамп рече дека Путин апсолутно полудел со лансирањето на најголемиот воздушен напад во војната врз Украина додавајќи дека размислува за нови санкции кон Москва, иако го прекори и украинскиот претседател Володимир Зеленски.
„Секако, почетокот на преговарачкиот процес, за кој американската страна вложи многу труд, е многу значајно достигнување и искрено сме им благодарни на Американците, а особено на претседателот Трамп, за помошта во организирањето и почнувањето на овој процес. Тоа е навистина важно достигнување. Во исто време, тоа е многу чувствителен, клучен момент, кој е поврзан со емоционалниот товар на сите вклучени и со емоционалните реакции“, рече портпаролот на Кремљ, Дмитриј Песков.
Украинските воздухопловни сили соопштија дека Русија лансирала 355 дрона и девет крстосувачки ракети кон Украина во текот на ноќта во она што портпаролот на воздухопловните сили го нарече најголемиот руски напад со дронови досега во војната.
Трамп изрази длабоко незадоволство од руското бомбардирање велејќи дека не е задоволен од рускиот претседател Владимир Путин.
„Не знам што му е. Што по ѓаволите му се случи? Убива многу луѓе. Не сум среќен поради тоа“, им рече Трамп на новинарите на аеродромот во Мористаун, Њу Џерси, додека се подготвуваше да се врати во Вашингтон.
Трамп ги даде овие забелешки како одговор на руските воздушни напади врз украинските градови во текот на ноќта во неделата вклучувајќи го и главниот град Киев.
Малку подоцна Трамп го даде истиот коментар на неговата мрежа.
„Отсекогаш сум имал многу добри односи со Владимир Путин од Русија, но нешто му се случи. Тој полудел целосно! Убива толку многу луѓе непотребно, а не зборувам само за војници. Ракети и беспилотни летала се лансираат врз градови во Украина без причина. Секогаш велев дека ја сака ЦЕЛА Украина, а не само дел од неа, и можеби ќе се докаже дека сум во право, но ако се обиде да го стори тоа, тоа ќе доведе до пропаст на Русија!“
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
САД и ЕУ имаат 18 месеци да се подготват за можен вооружен конфликт со Кина и Русија, кажа командант на НАТО

Врховниот командант на НАТО во Европа, генерал Алексус Гринкевич, процени дека САД и Европската Унија имаат година и пол да се подготват за потенцијален глобален вооружен конфликт со Кина и Русија.
Тој додаде дека верува оти Пекинг и Москва би можеле да нападнат истовремено и координирано, пренесува „Билд“.
– Она што кинескиот лидер Си Џинпинг веројатно ќе го направи пред да одлучи да преземе воена акција против Тајван е да му се јави на својот пријател Путин и да го замоли за помош. Тоа за мене значи дека обете работи би можеле да се случат истовремено – рече Гринкевич за време на конференцијата за одбрана во Висбаден, Германија, каде што се наоѓа Командата на НАТО за безбедносна помош и обука на вооружените сили на Украина.
Тој додаде дека 2027 година би можела да биде „потенцијална кризна година“.
– Ќе ни треба секое оружје, опрема и муниција што можеме да ја набавиме за да бидеме подготвени – нагласи командантот на НАТО.
Според германскиот весник, во владините кругови во Берлин расте стравот дека Русија наскоро би можела да нападне една од помалите земји-членки на НАТО, бидејќи се очекува земјите од Алијансата да постигнат сериозни одбранбени способности дури во 2029 година.
Според „Билд“, некои министри во владата на Фридрих Мерц очекуваат дека руска воена провокација би можела да се случи во 2027 година.
Свет
Авион принудно слетал во САД поради обид на патник да ја отвори вратата

Авион на линијата Омаха-Детроит во САД мораше да изврши итно слетување во Ајова поради патник кој се обидел да ја отвори вратата за време на летот.
Откако полицијата го уапсила, кај него пронашла 41 таблета од лекот „Ксанакс“.
Инцидентот се случил во среда навечер по локално време, за време на летот на авионот на „Скај Вест ерлајнс“, кој извршил итно слетување во Сидар Рапидс, во државата Ајова, објави Си-Ен-Ен.
Патникот кој се обидел да ја отвори вратата претходно се скарал со стјуардесата, според пилотот.
Авионот слета безбедно, а на видео објавено на социјалните мрежи може да се види како полицијата го вади патникот со лисици од авионот.
Свет
18 загинати и 40 исчезнати откако туристички брод се преврте во Виетнам

Најмалку 18 лица загинаа, а околу 40 се водат како исчезнати откако туристички брод се преврте во заливот Ха Лонг во Виетнам, објавија денес локалните медиуми.
Бродот, кој превезувал повеќе од 50 патници, се превртел поради ненадеен силен дожд што го погодил за време на посетите на местата на светското наследство на УНЕСКО, објави порталот „Ден Три“.
Граничните полицајци спасија 12 лица и пронајдоа 18 тела“, објавува порталот „ВНекспрес“.
Покраинските власти објавија дека ги пронашле телата на тројца виетнамски државјани и спасиле десет лица, како и дека потрагата по исчезнатите сè уште е во тек.
Околу 30 бродови потонаа во заливот Ха Лонг минатата година откако беа погодени од тајфунот Јаги.
Заливот го посетуваат милиони луѓе секоја година и е една од најпопуларните туристички дестинации во Виетнам, позната по сино-зелената вода и варовничките острови со тропски шуми.