Интер и Барселона одиграа спектакуларен реванш, а по продолженијата, италијанскиот шампион се пласираше во големото финале на Лигата на шампионите.
На крајот, Барселона мораше да се задоволи со место во полуфиналето, иако одигра неверојатно второ полувреме од натпреварот на стадионот „Џузепе Меаца“.
Стрелецот на првиот гол за Каталонците, Ерик Гарсија, беше доста разочаран од елиминацијата, особено поради начинот на кој се случи.
„Фудбалот беше многу нефер кон нас. Во второто полувреме губевме со 2-0 и тимот повторно покажа карактер. Не знам што се случува на овој стадион, но поради работи што беа надвор од наша контрола не го добивме она што го сакавме“, рече Гарсија, кој потоа продолжи:
„Сите знаеме што се случи со судијата минатиот пат кога игравме тука. Но, мора да бидеме горди. Ова беше година кога никој не веруваше во нас, а погледнете што постигнавме. Сè уште имаме да ја одиграме завршницата на Ла Лига. Бевме подобри од нив, но кога ќе примите гол во 93-тата минута, многу боли. Ова нема да нè поколеба за Ел Класико.“