Избори во Германија: Мерц во водство, екстремната десница станува главна опозициска сила

Излезните анкети покажуваат дека опозициските конзервативци предводени од Фридрих Мерц ќе победат на германските избори, а канцеларот Олаф Шолц и неговите социјалдемократи ќе претрпат најголем пораз по Втората светска војна.

Блокот ЦДУ/ЦСУ на Мерц освои 28.9 отсто од гласовите, по што следи Алтернативата за Германија со 19.7 отсто, според проценките на јавниот радиодифузен сервис АРД. Социјалдемократите завршија на третото место со 16.1 отсто , што е најлошиот резултат на партијата од Втората светска војна.

„Победивме на овие избори“, рече Мерц пред радосната толпа во седиштето на ЦДУ во Берлин, велејќи дека коалициската влада мора да се формира што е можно поскоро. „Светот надвор нема да не чека – и нема да чека долготрајни коалициски дискусии“.

„Блумберг“ известува дека конзервативниот блок ЦДУ/ЦСУ предводен од Мерц и СПД предводен од досегашниот канцелар Шолц би можеле да имаат доволно места за парламентарно мнозинство во двопартиска коалиција, покажува излезната анкета на АРД, но тоа ќе зависи од конечниот состав на Бундестагот.

Екстремно десничарската Алтернатива за Германија е на второто место според излезните анкети и се чини дека ќе стане главната опозициска сила во парламентот.

Следниот лидер се соочува со предизвикот да ја заживее економијата која од економски мотор на Европа стана заостаната. Владата исто така, ќе треба да се справи со променетиот политички пејзаж под американскиот претседател Доналд Трамп.

Текстот е ажуриран со најнови податоци од излезните анкети и изјавата на Фридрих Мерц

Во моментов нема коментари за веста. Биди прв да коментира...

Остави коментар