Иранските вооружени сили дадоа „понижувачки и соодветен одговор на суровоста на непријателот“, се вели во соопштението, додавајќи дека тоа кулминирало со напад врз американската база во Катар во понеделник вечерта и ракетни напади утрово врз Израел, пренесува Ал џезира.
Советот соопшти дека Техеран одговорил на нападите на негова територија на пропорционален и навремен начин и „го принудил непријателот да се покае, да признае пораз и еднострано да ја прекине својата агресија“.
„Вооружените сили на Исламската Република Иран, без никаква доверба во зборовите на непријателот и со прстот на чкрапалото, се подготвени да одговорат решително и одвраќајќи на секој чин на прекршување од страна на непријателот“, соопшти Врховниот совет за национална безбедност на Иран.
Американскиот претседател Доналд Трамп рано утрово објави дека е постигнат договор за прекин на огнот и дека војната меѓу Израел и Иран е завршена, но потоа двете страни истрелаа нови ракети.
