Американските царини и покрај паузата се на историски највисоко ниво

Додека финансиските пазари ја поздравуваат паузата на претседателот Доналд Трамп за повисоките царини за десетици трговски партнери, американските даноци на увоз сè уште се на историски највисоки нивоа, а рецесијата во САД сè уште е ризик, велат економистите.

Трамп вчера ги намали царините за земјите што претходно беа погодени со повисоки давачки на основната стапка од 10 отсто, со исклучок на Кина, која се соочува со увозна давачка од 125 проценти. Сепак, просечната стапка на царини во САД порасна на 24 отсто, што е зголемување за речиси 22 процентни поени откако Трамп го започна својот втор мандат, според „Блумберг економикс“ (Bloomberg Economics).

„Тоа значи дека целокупното влијание врз американската економија не се очекува да биде многу различно од претходните најави“, напишаа во извештај Рана Саџеди, Маева Кузин и Том Орлик од „Блумберг економикс“. Тие ги наведоа процените што ги користеа Федералните резерви на САД (Фед) во 2018 година за да ја направат процената според која зголемените царини може да го намалат американскиот раст за повеќе од три проценти и да додадат речиси два отсто на основната инфлација - „шок што ќе се случи во текот на две-три години“.

Bloomberg Mercury

 

Повисоките даноци за увоз ги зголемуваат трошоците за домашните потрошувачи и бизниси и ги намалуваат реалните расположливи приходи и профитните маржи, додека одмаздничките мерки на другите земји се закануваат да го намалат американскиот извоз. Царините исто така имаат тенденција да ги поскапат инвестициите, велат економистите.

„Дури и ако се отповикаат некои тарифи, сè уште е многу веројатно дека вкупната стапка ќе остане драматично повисока од она што е забележано со децении“, рече Тифани Вајлдинг, економистка во „Пацифик инвестмент менаџмент“ (Pacific Investment Management Co.), еден од најголемите светски инвеститори во обврзници. „Дури и ако одложувањето од 90 дена се одолжи и се претвори во подолг период, сепак мислиме дека шансите за рецесија во САД се 50/50“.

„Пацифик инвестмент менаџмент“ проценува дека секое зголемување од еден процентен поен на просечната ефективна царинска стапка намалува околу 0,1 поен од растот на САД, притоа додавајќи сличен износ на инфлацијата.

Како резултат на тоа, зголемувањето на ефективните американски царини (ако тие се имплементираат и одржуваат) „веројатно ќе ги доведе САД во рецесија и драматично ќе ја зголеми краткорочната инфлација“, додаде Вајлдинг. Процените не вклучуваат потенцијални неутрализирања преку намалување на даноците на доход или паушални плаќања на владата.

„Иако овие процени се многу променливи, јасно е дека американската економија не доживеала ваков шок од 1920-тите и 1930-тите“, додаде Вајлдинг.

Алекс Џоинер, главен економист во „ИФМ инвесторс“ (IFM Investors), очекува трговијата меѓу Кина и САД да „запре“ како резултат на царините од 125 проценти за пратките од земјата.

„Начинот на кој ќе одговори Кина веројатно ќе го постави тонот“, рече Џоинер, додавајќи дека од страна на Трамп би било „храбар потег“ ако се врати на казнениот царински режим објавен минатата недела. „Работите може дополнително да се влошат. А пазарите сè уште можат дополнително да се распродадат“.

 

Во моментов нема коментари за веста. Биди прв да коментира...

Остави коментар