Инвестицискиот фонд за обнова на Украина ќе има избалансиран систем на управување со еднаква застапеност на украинската и американската страна, а клучните одлуки ќе се донесуваат само едногласно, објави украинското Министерство за економија.
„Управата на Фондот ќе вклучува шест менаџери, тројца од украинска страна и тројца од американска страна. Тие ќе бидат членови на Управниот одбор на Фондот и ќе бидат членови на разни комитети“, се вели во соопштението, а пренесува „Укринформ“.
Се забележува дека Фондот ќе има четири комитети: Комитет за оперативно управување и ревизија, каде што застапеноста ќе биде паритет, два спрема два, Комитет за барање проекти со приоритет за украинската страна и Комитет за инвестициски одлуки, каде што мнозинството претставници ќе бидат од американската страна, пренесува Танјуг.
Дополнително, се нагласува дека клучните одлуки ги донесува Управниот одбор на Фондот исклучиво едногласно, што значи дека страните ќе бараат компромис.
Министерството за економија на Украина во вторник потпиша два дополнителни договори што ќе го регулираат лансирањето на Инвестицискиот фонд за реконструкција меѓу САД и Украина.