Ништо од Барселона и Реал: Та го избра клубот во кој ќе ја продолжи кариерата

Германскиот репрезентативец, Џонатан Та одлучи да си замине од Баер Леверкузен по крајот на оваа сезона или поточно по една деценија мината на „Бај Арена“.

Тој одлучи актуелниот договор кој му истекува наредниот месец да биде последен со клубот и како слободен играч да ја избере новата средина во кариерата. Со оглед на ваквиот статус, квалитет, знаење и искуство тој беше интересен за повеќе тимови, а во еден период најмногу се споменуваше Барселона.

Со оглед на тоа што Чаби Алонсо го презема Реал Мадрид, ова пак беше доволно во изминатиов период Та да го доведуваат и до преселба на „Бернабеу“, меѓутоа опцијата Шпанија нема да се реализира затоа што тој ќе остане во Германија.

Џонатан одлучил да му каже „ДА“ на актуелниот првак Баерн Минхен, ситуација за која се информирани „фармацевтите“ кои сега очекуваат потег од баварците за да можат да го ослободат стоперот за да настапи на престојното Светско клупско првенство.