Градоначалникот на Центар, Горан Герасимовски, во одговор на новинарско прашање изјави дека се подготвува за втор мандат.

„Изминатите три и пол години јас и мојот тим од Општина Центар работиме целосно во интерес на граѓаните, спроведувајќи голем број на проекти коишто дел се во реализација, цел се завршени. Но, имаме одличен план и програма којашто се спрема за следниот мандат“, додаде тој.

Кажа дека постојано се во кампања.

„Секако дека се подготвуваме, ние сме постојано и во кампања, но приоритет ни се граѓаните и проектите што ги имаме започнато и ветено пред граѓаните во 2021 година“, рече Герасимовски.

Осврнувајќи се на Договорот за стратешко партнерство со Обединетото Кралство, пратеникот од редовите на ВМРО-ДПМНЕ Никола Мицевски на денешната собраниска седница истакна дека парите во вредност од 6 милијарди евра ќе бидат насочени кон инвестиции за развој на инфраструктурата, здравството, образованието и енергетскиот сектор.

„За жал овој историски договор, овој историски момент за Македонија и граѓаните очигледно опозицијата не го препознава или не сака да го препознае, не го прифаќа или не сака да го прифати, ги обвинува за задолжување на државата идните генерации. Лично сметам дека овие обвинувања се неосновани и немаат никаква логика, но сепак тоа си е нивна работа и нивни одлуки како ќе дејствуваат за овој закон или оваа ратификација на овој Договор“, додаде Мицевски.

Посочи дека граѓаните гледаат кој што прави.

„Имено со цел да се расветлат сите овие нејаснотии и обвинувања од страна на опозицијата, а и за да нема никакви дилеми за граѓаните би сакал колку што е можно во овој момент подетално и поконкретно да ги објасните придобивките од овој договор и какво значење ќе има овој договор за иднината на Македонија и граѓаните?“, запраша Мицевски.

Во врска со оперативниот план за 2025 година кој Владата го објави во текот на вчерашниот ден, Мицевски појасни како е дојдено до тоа.

„Минатата година имавме парламентарни избори на кои граѓаните дадоа огромна поддршка на ВМРО-ДПМНЕ и коалицијата што истовремено значеше огромен и историски пораз на владата на СДСМ и ДУИ. Пораз на нивните девастирани и катастрофални политики на секое поле. Непобитен факт е дека кога ВМРО-ДПМНЕ ја презема власта наследи запрепастувачка состојба и хаос, уништена држава, испразнет и искраден буџет, економија на колена, индустрија скоро како да немаше, инфлација до небо, работници без редовни плати и уште многу негативни појави од погубното владеење на претходната влада. За разлика од тогаш веќе се забележува дека Македонија почнува да закрепнува на секое поле и пополека но сигурно оваа Влада почнува да ги решава проблемите кои ги наследи, нема да биде лесно, сигурен сум дека со работата која се вложува ќе се успее. Овој оперативен план за вработување за 2025 година е дел од тој процес на закрепнување на државата и очекувам дека ќе даде позитивен и дополнителен ефект“, рече Мицевски.

Побара од министерството за економија и труд да даде подетални информации и податоци за тоа колку лица се планира и се очекува да бидат вработени.

„Моето прашање е оттука во интерес на младите и јавноста би сакал да дадете подетални информации и податоци за тоа колку лица се планира и се очекува да бидат вработени со овој план, што содржи овој план, што може невработените лица и младите од Македонија да очекуваат од овој оперативен план за 2025 година?“, запраша Мицевски.

СДСМ прашува зошто ВМРО-ДПМНЕ молчи за дивоградбите на Меџити и Ганиу?

„ВМРО-ДПМНЕ со денови молчи за скандалите кои се објавуваат за нивните колаициски партнери Ганиу и Меџити. Зошто Владата досега не го ангажирала државниот градежен инсекторат да интервенира и да санкционира, ако е виситина дека има преку 150 дивоградби во Општина Чаир. Дали Владата предовдена од ДПМНЕ сака повторно да се случи некоја трагедија во нелегелизирани и опасни ообјекти за да реагира или по секоја цена ќе го штити коалицискиот партнер?“, прашува СДСМ.

Партијата бара итно да излезат сите надлежни државни институции и да ги проверат наводите на градоначалничката Арсовска која, како што велат, е кадар на ВМРО-ДПМНЕ, и да се постапи без исклучок по однос на сите нелегални објекти.

„Додека Тошковски и Мицкоски имаат полна уста неселективност, молчат пред очигледен криминал кој го прави Ганиу во Чаир. Дали и тие се дел од шемата и заради тоа го штитат криминалот?“, прашуваат од СДСМ.