Путин ги даде овие забелешки во Москва за време на состанокот со иранскиот министер за надворешни работи Абас Аракчи, додека ескалацијата на конфликтот меѓу Иран, Израел и САД продолжува.
„Ова е апсолутно неиспровоцирана агресија против Иран. Нема никаква основа и никакво оправдување“, рече рускиот претседател.
Тој додаде дека ставот на Русија за актуелните настани веќе е јасно изразен и артикулиран од страна на руското Министерство за надворешни работи.
Претходно, руското министерство издаде официјално соопштение во кое Москва „остро ги осуди нападите на САД врз иранските нуклеарни постројки“ и повика на итно прекинување на агресијата и зајакнување на дипломатските напори за смирување на ситуацијата.
Израел започна воена операција против Иран во ноќта на 13 јуни, а Исламската Република возврати со напад помалку од 24 часа подоцна. Нападите продолжуваат, при што двете страни пријавуваат смртни случаи и повредени, како и напади врз повеќе цели.
Соединетите Американски Држави се вклучија во вооружениот конфликт девет дена откако тој ескалираше, ноќта на 22 јуни, американски бомбардери нападнаа три ирански нуклеарни постројки: во Фордоу, Натанз и Исфахан.
