Казна затвор до три години за ширење дезинформации предвидува новиот закон усвоен во Турција. Замолчување на критичарите во Турција или борба за вистина?

Photo by Markus Winkler on Unsplash

Турскиот парламент синоќа усвои Закон што наводно има за цел борба против лажните вести и дезинформациите, со оспорувани одредби што предвидуваат и затворски казни за ширење дезинформации.

Донесувањето на законот беше проследено со многу реакции во јавноста и сомневање дека целта не е борба против дезинформации туку замолчување на критичарите.

Најконтроверзната одредба во новата легислатива, членот 29, предвидува казна затвор до три години за ширење информации што се „спротивни на вистината” за прашања од областа на безбедноста, јавниот ред и здравјето во Турција, односно ширење дезинформации што наводно имаат намера да предизвикаат загриженост и паника во јавноста.

Опозицијата соопшти дека новата легислатива е со цел замолчување на критичарите на власта пред јунските претседателски и парламентарни избори. Критичарите предупредуваат дека корисниците на социјалните мрежи може да бидат притворени доколку споделат содржина која власта ја смета за лажна.

Падот на медиумите кои шират проруски дезинформации во Словачка

„Оние што велат ‘има сиромаштија’ ќе одат во затвор. Оние што велат ‘има корупција’ ќе одат во затвор”, изјави Енгин Алтај, пратеник од главната опозициска Републиканска народна партија.

Законот од 40 членови беше усвоен од владејачкото мнозинство во Парламентот. Во мнозинството се пратеници на Партијата на правдата и развојот на претседателот Реџеп Тајип Ердоган и нејзините коалициони партнери.

На гласањето му претходеа бурни седници во Парламентот, со спротивставувања на пратениците од опозицијата. Тие во неколку наврати ја прекинуваа расправата и го осудуваа новото законско решение, кое го нарекуваа „закон за цензура“.

Ердоган се заложи за усвојување на Законот, истакнувајќи дека лажните вести и растечкиот „дигитален фашизам” се закани за националната и глобалната безбедност.