Украинскиот претседател Володимир Зеленски ќе пристигне на 15 мај во официјална посета на Црна Гора, каде што ќе се сретне со претседателот Јаков Милатовиќ, со кого ќе потпише билатерален договор за безбедност, во пошироката рамка на соработка меѓу Украина и земјите-членки на НАТО, дознава подгоричкиот портал „Дан“.
Целта на овие договори е да се обезбеди долгорочна поддршка на Украина во областа на безбедноста и одбраната, преку воена помош, обука, разузнавачка соработка и зајакнување на отпорноста на земјата во услови на руска агресија.
„Со овој чин, Црна Гора ќе ја потврди својата силна поддршка за територијалниот интегритет и суверенитет на Украина и ќе се придружи на групата членки на НАТО кои веќе ги презедоа обврските според заедничката декларација од јули 2023 година“, пишува порталот, објави Танјуг.
Се очекува деталите од договорот да бидат објавени по официјалното потпишување во Подгорица.