„Визер“ почнува со продажба на авиобилети за Барселона, Лион и Штутгарт од скопскиот аеродром

По денешната средба меѓу генералниот директор на „ТАВ Македонија“, Неџат Курт, и управниот директор на „Визер“, Роланд Тишнер, билетите за трите нови авиолинии од Меѓународниот аеродром „Скопје“ до Барселона, Лион и Штутгарт се официјално во продажба на веб-страницата на „Визер“.

Патниците на скопскиот аеродром од 2025 година може лесно да стигнат и да ја истражуваат Барселона, раздвижениот град познат по својата уникатна архитектура, богата историја и живописна култура; Лион, познат по својата кулинарска извонредност и историска значајност и задолжителна дестинација за љубителите на храна и љубителите на културата; и Штутгарт, познат по автомобилската индустрија и прекрасните паркови, кој нуди спој на современост и традиција; а гостите од овие европски градови може да ги истражуваат природата, историјата и кулинарството на Скопје и Северна Македонија.

„Како ТАВ-аеродроми, воодушевени сме што можеме да го објавиме враќањето на Барселона како дестинација за одмор од скопскиот аеродром од 3 мај 2025 година, на која ќе сообраќа ‘Визер’, особено затоа што тоа беше најпосакуваната рута од нашите патници. Дополнително, освен до Барселона, ‘Визер’ в година ќе ги воведе и Лион и Штутгарт како нови дестинации од скопскиот аеродром, што ќе биде предност за сите бидејќи со ова се проширува мрежата на дестинации од скопскиот аеродром, мапата на авиолинии на ‘Визер’, како и опциите за патување за секој авантурист. Преку ова проширување на мрежата на авиолинии со нетрпение очекуваме и целиме кон понуда на поголема удобност и подобрување на поврзувањето за нашите патници со светот“, изјави Неџат Курт, генерален директор на „ТАВ Македонија“.

Новите авиолинии од/до Барселона и Лион ќе бидат оперативни почнувајќи од мај 2025 година нудејќи им на патниците возбудливи можности да ги истражуваат енергичните европски градови по пристапни цени во претстојното лето. Директните летови до/од Штутгарт почнуваат да сообраќаат од септември 2025 година.

„Овие нови авиолинии од Скопје ја истакнуваат нашата посветеност да нудиме удобни и достапни опции за патување за нашите патници“, изјави Роланд Тишнер, управен директор на „Визер Унгарија“.

„Возбудени сме што можеме да ја диверзифицираме нашата мрежа и да го поврземе Скопје со популарните дестинации, како што се Барселона, Лион и Штутгарт. Овие нови конекции ќе им овозможат на патниците да истражуваат нови возбудливи локации и да се впуштат во незаборавни авантури истовремено нудејќи им можност на туристите од Западна Европа да ги откријат скриените убавини на Северна Македонија“.

Резервациите за трите нови дестинации достапни од Меѓународниот аеродром „Скопје“ се отворени од денеска, летовите ќе почнат на 3 мај 2025 година (Барселона) и ќе сообраќаат секој вторник и сабота, на 1 мај 2025 година (Лион), со летови закажани за вторник, четврток и сабота, а летовите до Штутгарт ќе почнат да сообраќаат на 29 септември 2025 година, со летови трипати неделно, понеделник, среда и петок.

Летовите до новите дестинации од Меѓународниот аеродром „Скопје“ може да се резервираат на официјалната веб-страница на „Визер“ и преку мобилната апликација на авиокомпанијата. Основните цени почнуваат од 24,99 евра за Штутгарт и 29,99 евра за Лион. Летовите од Скопје до Барселона се достапни за цена од 31,99 евро.

 

Текстот „Визер“ почнува со продажба на авиобилети за Барселона, Лион и Штутгарт од скопскиот аеродром е превземен од МАКФАКС.