Д-р Маја Пантовиќ Стефановиќ, психијатар од Универзитетскиот клинички центар на Србија, објаснува како депресијата се лекува, колку е важна улогата на семејството и како да се препознае таканаречената функционална депресија.

Депресијата ги погодува сите возрасти и професии

„Депресијата ги погодува двата пола, младите, средовечните, луѓето од сите социјални категории и професии. Пристапот кон пациентот зависи од неговите специфични околности,“ вели докторката.

Некои пациенти побрзо ја препознаваат состојбата и бараат помош со поддршка од семејството. Но, има и такви кои долго време ја игнорираат болеста, често поради стигмата или недоразбирањето.

Важноста на семејната поддршка

Семејството игра клучна улога во поддршката на пациентите.

„Неопходно е семејството да го слуша пациентот, да му даде целосна поддршка без осудување и да го охрабри да побара стручна помош. Помош од семејството е особено важна во ситуации кога пациентот има тешкотии дури и со наједноставните секојдневни активности, како станување, облекување или јадење,“ додава д-р Пантовиќ Стефановиќ.

Физичката активност, како прошетки и време поминато во природа, исто така, има значајна улога во процесот на опоравување.

Генетика, стрес и индивидуални реакции

Депресијата може да има генетска основа или да биде предизвикана од стресни животни настани.

„Како ќе реагира секој пациент е многу индивидуално. Не сите предизвикувачи имаат исти последици за сите луѓе,“ објаснува докторката.

Функционална депресија – честа, но тешко препознатлива

Во современиот свет, многумина продолжуваат да функционираат на „автопилот“ и ги игнорираат симптомите. Овој тип на депресија, познат како функционална депресија, е особено сложен бидејќи пациентите можат да изгледаат продуктивни, но внатрешно се борат со сериозни проблеми.

Симптомите не се секогаш очигледни

Покрај тага и лошо расположение, депресијата може да се манифестира преку физички симптоми како главоболки, болки во стомакот или разни други телесни болки.

Барањето стручна помош не е знак на слабост, туку на сила. Разбирањето, поддршката од блиските и прифаќањето на болеста како здравствен предизвик се клучни за успешно лекување и подобар живот.