Наместо да се бара одговорност и да се спречат сите компромитирачки дејствија во врска со 150 дивоградби во Чаир, ситуацијата добива нови размери, а мрежата на инволиврани во овој мега скандал се проширува, рече денеска на прес-конференција, Љубица Јанчева, координаторка на советничката група на СДСМ во Советот на Град Скопје.

„Последните информации покажуваат фрапантни работи. Катастарот за недвижнини донел решение со кое ги избришал претходно впишаните нелегални „легализации“ за над 150 дивоградби во Чаир, за кои од јавноста дознавме дека биле впишани во Катастарот врз основа на фалсификувани документи. Според информации, доставени до нас од свиркачи, Катастарот донел решение за бришење на решение за впишување на објект, по барање, кое било доставено на 2.мај 2025 година, а архивирано на 25. мај 2025 година. За да биде ситуацијата уште потрагична, општина Чаир носи документ дека на локацијата каде што е изградена зградата било предвидено изградба на улица, но и покрај тоа на тоа место се изградила зграда. Ова решение на општина Чаир потоа исчезнало во општинските лавиринти“, вели Јанчева.

Таа постави и неколку прашања.

„Прашуваме, дали во оваа спрега на урбаната мафија е инволвиран и директорот на Катастарот Иван Живковски? Живковски претходно беше претседател на Советот на општина Кисела Вода и претседател на. Општинскиот комитет на ВМРО-ДПМНЕ од Кисела Вода. Каква корист имаат Мицкоски и ВМРО-ДПМНЕ од 150 дивоградби во Чаир? Зошто од ВМРО-ДПМНЕ ги штитат подобните од нивниот коалициски партнер ВЛЕН? Недозволиво е институциите да молчат и да го покриваат криминалот на урбаната мафија. ВМРО-ДПМНЕ ветуваше де-ДУИзација, само за да ја промени со ВЛЕН-изација“, кажа советничката.

Нагласи дека како советничка група во Советот поднеле и барање за свикување на седница на Советот на Град Скопје.

„Советот има обврска за вака важно прашање да дискутира, да видиме дали и во други општини под власт на ВМРО-ДПМНЕ, ВЛЕН и ЗНАМ има вакви криминали со дивоградби. Недозволиво е членовите на Советот за вакви прашања да дознава од медиумите. Ги повикуваме сите советници да го поддржат нашето барање. Да покажат одговорност и да ги надминат политичките игри. Граѓаните го бараат тоа од нас, од сите членови на Советот кои со својот глас во Советот одлучуваат за нивните судбини“, кажа Јанчева.

Никогаш досега правдата не била толку понижена и ставена под целосна команда на политичката власт, велат од ДУИ.

„Случајот во Кочани и тишината околу урбаната катастрофа во Чаир се живи докази дека Јавното обвинителство е претворено во покорна алатка на извршната власт.

Во Кочани, по трагедија што го потресе целото општество, истрагата е затворена без ниту еден партиски функционер да биде повикан како осомничен иако е јасно за секој граѓанин дека одговорноста е директна и лежи врз Министерството за внатрешни работи и надлежните институции.

Молкот на обвинителството е форма на политичка амнестија и навреда за жртвите и нивните семејства.

Во Чаир, во реално време се случува урбан криминал.
Повеќе од 150 бесправни градби без статички проекти, без сеизмичка проценка, со нелегално поврзување на струја и без пристап за пожарна или брза помош се живи закани за илјадници граѓани.

Луѓето што купиле станови таму не можат да спијат мирно поради страв за животите на своите деца и семејства..

Ова веќе не е селективна правда ова е укината правда, диригирана, контролирана, и свесно насочена против интересот на граѓаните.

А кога правдата молчи таму каде што треба да зборува, таа станува соучесник на криминалот“, стои во соопштението на ДУИ.

Општина Аеродром го добива првото мултифункционално спортско игралиште, на кое покрај фудбал и кошарка, ќе може да се игра и тенис.

Станува збор за игралиште кое е сместено во срцето на Ново Лисиче и кое ќе биде целосно реконструирано за првпат од неговата изградба пред неколку децении.

В. д. градоначалникот на Општина Аеродром, Дејан Митески, заедно со пратеничката Катерина Димитровска извршивија увид во отпочнувањето на реконструкцијата.

Ова игралиште ќе добие сертифицирана мултифункционална подлога, за безбедна игра и спортување.

Она што е ново е тоа дека подлогата е соодветна и за играње тенис, со што аеродромци за првпат ќе добијат современо спортско игралиште со јавни тениски терени, кои со поставување на специјални мрежи ќе можат да се прилагодуваат според потребите на граѓаните.

Аеродром е позната како општина каде што владее врвен спортски дух и токму во тој правец ќе продолжиме и во иднина да создаваме уште подобри услови за развој на спортот во секој дел од нашата општина.