Во време на дигитални лавини, книгата останува отпор – Отворен 37. Саем на книгата во Скопје

Саемот на книгата, најголемата книжевна манифестација во земјата, денеска го отвори своето 37. издание во арената „Борис Трајковски“ во Скопје. И годинава, настанот привлекува издавачки куќи, автори, читатели и љубители на пишаниот збор од целата држава и пошироко.

Под мотото дека „книгата не нè преплавува – таа нè обликува“, Саемот се поставува како тивок, но моќен отпор во ерата на трепкачки наслови, брзи вести и информации што исчезнуваат пред да бидат разбрани. Книгата, за разлика од виртуелниот хаос, останува учител, придружник и сведок на културниот и општествен развој.

Издавачите нудат илјадници наслови – од најнови романи и есеистички дела, до стручна литература, графички новели, детски книги и изданија за сите генерации. Посетителите ќе имаат можност да купуваат со попусти, да се сретнат со автори, да присуствуваат на промоции, дебати, читања и да бидат дел од еден ретко сочуван простор за мисла, тишина и отпор.

Саемот ќе трае до 14 мај, а вратите се отворени секој ден за сите што сè уште веруваат во трајната моќ на книгата да нѐ менува – не за еден клик, туку засекогаш.