Лидерска средба на која ќе презентира план што треба да се направи во следниот период за државата и за семејствата од Кочани, ќе побара претседателот на СДСМ, Венко Филипче. Од оваа партија бараат да се разговара за вистински реформи во правосудството, промени во здравствениот систем, почеток на изградбата на Клиничкиот центар, суштински промени во образованието, дуплирање на примањата на наставниците и промена во системот на јавната администрација.
Од оваа партија најавија дека ќе бараат и анкетна комисија за утврдување на одговорност. Ова е и барање на ДУИ, кои денеска го дополнија со нов момент- Европската Комисија да испрати тим од експерти кои ќе ја следат истрагата, за што е во притвор и нивниот поранешен министер,Крешник Бектеши.
Од коалицијата „Вреди„ им одговорија дека нема да дозволат манипулации со вистината од креаторите на корумпираниот систем.
Од владата побараа сериозен пристап кон сериозни ситуации.
Досега ниту една анкетна комисија во Собранието немала конкретен епилог. Анкетната комисија, формирана за случајот „Онкологија„,заврши без официјални заклучоци, поради дијаметрално спротивставените ставови на нејзините членови. За модуларната болница, „Беса транс„ и „Дурмо турс„, не беа формирани посебни комисии. Се обиде да заседава постојната анкетна комисија за заштита на човековите права, но не успеа затоа што пратениците од СДСМ и ДУИ не се појавија и немаше кворум за работа.
Далиборка Демјанска Цветановска