Најсериозниот кандидат за германски канцелар најави постојани гранични контроли

Фридрих Мерц, конзервативниот фаворит во трката за канцеларската позиција во Германија, повика на радикална ревизија на миграциската политика на земјата, вклучувајќи постојани гранични контроли. Коментарите дојдоа по апсењето азилант од Авганистан што е обвинет за фатално убиство на двегодишно дете и маж во парк во средата.

Ако биде избран за канцелар во февруари, „ќе има де факто забрана за влез во Сојузна Република Германија за секој што нема валидни документи за влез или што  ќе ја искористи европската слобода на движење“, изјави Мерц за новинарите во Берлин во четвртокот. „Тоа важи и за лица со право на заштита“.

Правилата на Европската Унија предвидуваат дека азилот е основно право и меѓународна обврска.

Лидерот на конзервативната ЦДУ (CDU) ги нарече постојните миграциски правила „дисфункционални“ и изјави дека ќе ги суспендира ако биде избран за канцелар. „Германија мора да го искористи своето право на предност на националните закони“, рече Мерц.

Нападот со нож во градот Ашафенбург близу Франкфурт неделава беше последен во низата смртоносни инциденти што ја разгореа дебатата за домашната безбедност и миграцијата пред парламентарните избори во Германија следниот месец. Истражувањата покажуваат дека јавната фрустрација со политиките на владата помогнала да се зголеми поддршката за екстремистичките партии.

Членови на владата на канцеларот Олаф Шолц и на конзервативниот блок на Мерц повеќепати повикаа на построги правила за имиграција пред изборите на 23 февруари. Сепак, имплементацијата на построги правила и осигурувањето дека одбиените азиланти ќе ја напуштат земјата се покажаа како тешки за властите.

„Прекуглава ми е дојдено од тоа да гледам вакви акти на насилство, кои се случуваат тука на неколку недели — од извршители што всушност дошле кај нас да најдат заштита овде“, посочи Шолц во објава на X.

Во моментов нема коментари за веста. Биди прв да коментира...

Остави коментар