• Горан Упале
Во еден извонреден чекор за иднината на клубот и фудбалот во Македонија, Шкупи денес формализираше голем договор за соработка со „Кралскиот деловен совет“, една од највлијателните економски, дипломатски и спортски институции во регионот на Заливот, која работи под покровителство и поддршка на кралските семејства на Дубаи и Обединети Арапски Емирати.
Овој договор на високо ниво, потпишан од претседателот на „Кралскиот деловен совет“, д-р Сулејман Ташчи, и претседателот на Шкупи, Јасин Коњали, ги отвора вратите за партнерство кое има за цел да го издигне Шкупи на највисоките нивоа на меѓународниот фудбал, но во исто време носи нова филозофија во развојот на млади таленти на Балканот.
Во изјава на официјалната веб-страница на клубот од Чаир, новиот партнер на клубот, Сулејман Ташчи, нагласи дека оваа соработка не е обичен договор, туку мултидимензионален проект кој вклучува фудбал, образование, спортска дипломатија и меѓународен развој.
„Не создаваме само спонзорско партнерство. Градиме голема визија, платформа која црпи инспирација од европските и глобалните модели. Целта ни е да создадеме мрежа од збратимени клубови и академии во Дубаи, Абу Даби, Доха, Ријад, па дури и во Скопје, за да ја подготвиме следната генерација фудбалски ѕвезди од Балканот за меѓународната сцена. Шкупи ќе биде центар на овој проект на Балканот, со целосна поддршка од Кралскиот бизнис совет и инвеститорите од земјите од Заливот“, рече Ташчи.
Тој, исто така, ја нагласи важноста од поврзување на универзитетите и културната размена преку спортот, нарекувајќи го проектот „нова спортска дипломатија што ги обединува луѓето преку образование и страст за фудбал“.
Од друга страна, претседателот на клубот, Јасин Коњали, изјави дека ова е денот кога Шкупи официјално влегува во нова ера:
„Ова е историски момент за нашиот клуб. За нас, овој договор е стратешки чекор кон целосна професионализација на академијата и на клубот како целина. Градиме мостови меѓу Балканот и арапскиот свет, меѓу Скопје и Дубаи, а пред сè, им даваме можност на нашите млади да сонуваат и да достигнуваат височини“, рече Коњали.
Што вклучува договорот?
• Изградба на професионална фудбалска академија во Скопје, со европски стандарди.
• Заемна обука за тренери и технички персонал.
• Стипендии и размени за млади играчи со академии и универзитети во Обединетите Арапски Емирати, Катар, Саудиска Арабија итн.
• Градење партнерства со елитни клубови на Блискиот Исток и Европа, за развој на таленти и споделување на техничко искуство.
• Развивање мрежа на збратимени клубови и градови во регионот и Блискиот Исток.
• Отворање на официјалното претставништво на „Кралскиот деловен совет“ во Скопје, како фокусна точка за меѓународна соработка и проекти.
Покрај фудбалот, „Кралскиот деловен совет“ најави и други стратешки инвестиции во Македонија, кои ќе влијаат на области како што се образованието, технологијата и економскиот развој, гледајќи ја земјата како важен центар за долгорочни проекти во регионот.
