• Иван Димовски
Македонската тениска федерација ќе биде домаќин на третата Европска група од Дејвис купот. Освен нашата репрезентација, во неа ќе се натпреваруваат Малта, Летонија, Молдавија, Ерменија и Црна Гора.
Наш прв противник ќе бидат Малтежаните во вторник, а првиот меч е закажан во 10:30 часот. Според селекторот Горан Шевченко, добро е што Малта ќе биде прв ривал во групата.
„Добро е што ќе стартуваме против Малта, а потоа следуваат мечевите со Црна Гора (среда), Молдавија (четврток), Ерменија (петок) и Латвија (сабота). На почетокот на секој меч се играат двата сингла, кај нас ќе бидат Калин и Берк. Тие двајцата добро играат и како двојка тоа го покажаа и на Macedonian Open. Секако важно за тимот ќе биде другите да придонесат за реултатите. Латвија, Црна Гора, Молдавија и Македонија ќе конкурираат за првите три места, но не треба да се потценат ниту Малта и Ерменија. Секој меч ќе биде важен“, изјави Шевченко.
Освен селекторот, кратко свој коментар даде и нашиот најсилен адут Калин Ивановски, кој кажа:
„Среќни сме што повторно ќе играме на домашен терен, а ги повикувам гледачите да гледаат добар тенис и да ни дадат поддршка“.
Зборуваше и Берк Бугариќ кој призна дека секогаш е среќен да игра за Македонија.
„Најдоброто за секој тенисер е кога има можност да ја претставува својата држава. Со нетрпение го очекуваме почетокот на мечевите и сметам дека ќе ја минеме групата и ќе влеземе во Втората Светска група“, посочи Бугариќ.
Краток коментар за она што следува дадоа и најискусниот Стефан Мицов, како и Амар Хусеиновиќ и дебитантот Кристијан Јанев.
„Со настапот дома имаме добри шанси, но она што е поважно е дека има добра енергија во тимот за да постигнеме добри резултати“, изјави Мицов.
„Извонредно е чувството да се настапува во Македонија. Сметам дека сме добро подготвени и дека можеме да се пласираме во Втората група“, смета Хусеиновиќ.
„Ова за мене е прв настап во сениорскиот тим. Добро сме подготвени имаме и потенцијал за Втора група, воедно ги повикувам сите да дојдат да не гледаат“, прокоментира најмладиот во нашиот тим.
Целта на Македонија е добар старт, а потоа и пласман меѓу првите три селекции во групата со што би се изборил пласман во втората Светска група.
