Општина Гази Баба и оваа година го реализира проектот — финансиска поддршка за секое дете запишано во прво одделение.

„Овој проект има за цел директно да ги поддржи семејствата на нашите најмлади ученици во еден од најважните моменти од нивниот живот — почетокот на формалното образование. Со доделување на еднократна помош во висина од 3.000 денари по дете, сакаме да придонесеме за полесно справување со трошоците кои се јавуваат при подготовката за прво одделение: набавка на училишен прибор, облека и други потребни материјали“, велат од Општината.

За остварување на правото на финансиска поддршка, потребно е родителот или старателот да поднесе барање до Општина Гази Баба, со следните документи во прилог:

-Извод од матична книга на родени за првачето

-Копија од решението за старателство (доколку е применливо)

-Потврда за запишан ученик во прво одделение, заверена од основно училиште на подрачјето на Општина Гази Баба

-Копија од важечка лична карта или патна исправа на родителот кој го поднесува барањето

-Копија од банкарска картичка и трансакциска сметка на родителот кој го поднесува барањето

Општина Гази Баба ги повикува граѓаните да ја искористат можноста и да поднесат барање.

Постапувајќи по кривична пријава од група граѓани, Основното јавно обвинителство Скопје почна истражна постапка против едно лице за кривично дело бесправно градење.

„Објектот почнал да се гради 2024 година, без одобрение и на државно земјиште, на улицата Кемал Сејфула во Чаир. Осомничениот, како управител на правно лице, се јавува како инвеститор на градбата – станбена зграда со деловни простории и катност По+П+6+Пк наменети за продажба“, соопшти Обвинителството.

По наредба на јавен обвинител, овластен судски вештак од областа на градежништвото констатирал моментна фаза на изграденост, односно изведени армирано-бетонски работи, целосно бетонирана скелетна армирано-бетонска конструкција, столбови, греди и плочи од подрумот до шестиот кат, како и ѕидање надворешни и внатрешни ѕидови со блок-тула.

Јавниот обвинител до судијата на претходна постапка достави предлог за определување мерки на претпазливост – обврска да се јавува кај определено службено лице, привремено одземање на патната исправа и забрана за изведување градежни работи на објектот дивоградба.

Судијата кој одлучувал за враќање на пасошот на Јахоски треба да се разреши, изјави Валентин Манасиевски, член на ЦК на ВМРО-ДПМНЕ, на новинарско прашање за коментар по изјавата на судските власти дека гаранцијата од речиси 2 милиона евра е доволна да му се издаде пасош на Асмир Јахоски за напуштање на државата.

„Кога станува збор за случајот со Асмир Јахоски, едно е јасно – дека институциите треба веднаш да преземат активности. Прво, треба да се провери начинот на кој тој го добил привремениот пасош и, второ, следствено на ова, веднаш да биде разрешен судијата што му го дал овој привремен пасош. Замислете, доколку на секој осомничен за криминал, доколку сака да ја напушти државата, да оди на некакви забави надвор од државата, судот му дава пасош или му го враќа или му дава привремен, би настанал тотален хаос во државата“, рече тој.

Јахоски е дел од истрага против 13 лица и една фирма за злоупотреби и перење пари при набавка на мазут со сомнителен квалитет за државните електрани.

Вчера, ВМРО-ДПМНЕ обвини дека Јахоски, кој, како што рекоа, го оштетил буџетот на државата за неверојатни 167 милиони евра и за кого се води постапка, ужива на Босфорот.

„Откога доби домашен притвор за кривично дело перење пари и други приноси за набавката на мазут со сомнителен квалитет и потекло, синот на пратеникот на ДУИ сега можеме да го видиме во медиумите дека е на Босфорот, Турција. Судиите избрани од ДУИ и СДС му го укинаа притворот и му го одзедоа пасошот бидејќи тој даде милиони гаранција дека нема да бега, сега се поставува прашањето како е тој во Турција, каде што ги троши милионите што ги проневерил“, велат од ВМРО-ДПМНЕ.