Заборави на хотелите со пет ѕвезди и скапите коктели на прометни плажи – вистинското лето почнува со ранец на грб, Google Maps во џеб и максимум 500 евра во паричникот.
Одморот не мора да биде луксузен за да биде добар, а токму најевтините патувања често се оние што ги паметиме цел живот.
„Лани со пријателката бевме во Албанија, во Драч, и целото патување нè чинеше околу 450 евра за двете“, раскажува Даниела Митревска, 29-годишна скопјанка. „Престојувавме во мал приватен апартман преку Airbnb, носевме дел од храната од дома и користевме автобус наместо сопствен автомобил. Беше едноставно, но незаборавно“.
Клучот лежи во неколку паметни потези. Прво, резервирање однапред. Билетите и сместувањето се најевтини најмалку два до три месеци пред одморот.
Второ, избор на дестинации кои не се комерцијално „жешки точки“. Наместо Халкидики, избери места како Тасос или Евија. Наместо Будва, пробај Улцињ или Петровац. Албанија и Босна и Херцеговина стануваат сѐ попопуларни токму поради пристапните цени.
Трето – делете трошоци. Групните патувања со пријатели или со семејство значат поевтини сместувања, поефикасна употреба на автомобил и заедничка набавка на намирници.
„Пет дена престој во Мостар со жена ми и децата нѐ чинеше 470 евра сѐ на сѐ – со гориво, храна, влезници за музеј, дури и сладоледи и сувенири“, вели Никола Аврамовски, машински техничар од Куманово. „Не е до тоа колку пари имаш, туку како ги трошиш“.
Исто така, треба да се избегнуваат туристичките замки: скапи ресторани на прва линија до плажа, организирани тури и брзи авиолетови со прикриени трошоци. Наместо тоа, истражи го локалниот пазар, пробај улична храна, користи јавен превоз и одбери апартмани со кујна.
Последниот совет е да се патува со „отворен ум“. Најубавите приказни не се случуваат во хотел со 5 ѕвезди, туку на селска тераса со поглед на море, чашка домашно вино и разговор со локалец кој ќе ти раскаже каде има скриена плажа што не ја знае Google Maps.
Патувањето не е прашање на пари, туку на избор. А ако добро ги направиш, и 500 евра ќе ти бидат повеќе од доволни.
Б.З.М.
