Свет
„Многу е тешко да се спречи стампедо или грабеж“: Црвената полумесечина за испраќањето помош во Газа

Палестинската црвена полумесечина денес соопшти дека жителите на Газа сè уште не добиле помош што ја преминала границата оваа недела и дека испраќањето толку мал број камиони е покана за убивање поради ризикот од стампедо и насилни грабежи.
„Ниеден цивил сè уште не добил помош. Повеќето камиони сè уште се во Карем Шалом на границата, но не пристигнале во Газа“, изјави за новинарите Јунис Ал-Хатиб, претседател на Палестинската црвена полумесечина. „Многу е тешко да се спречи стампедо или грабеж што би можел да се случи“, додаде тој.
Шефот на палестинската црвена полумесечина денес изјави дека активностите на неговата организација во Газа би можеле да бидат прекинати за неколку дена поради недостаток на нова помош, како и недостаток на гориво, поради што капацитетот на амбулантните возила е намален на една третина.
Брашно и други залихи почнаа да пристигнуваат во некои од најранливите области во Газа откако Израел дозволи неколку камиони да поминат, но помошта не е ни приближно доволна за да го надомести недостигот предизвикан од 11-неделната блокада на Израел, соопштија палестински претставници.
На прашањето колку долго неговата организација може да продолжи да работи во крајбрежната енклава, претседателот на Палестинската црвена полумесечина им рече на новинарите во Женева дека тоа е прашање на време.
„Може да поминат денови. Ни снемува гориво. Капацитетот на амбулантните возила што ги користиме сега е една третина“, додаде тој, велејќи дека возилата на бензин веќе престанале да работат, но дека некои, обезбедени од Обединетите нации, користат сончева енергија.
Палестинската Црвена полумесечина е дел од најголемата хуманитарна мрежа во светот, Меѓународната федерација на друштвата на Црвениот крст и Црвената полумесечина, и обезбедува медицинска нега во Појасот Газа и во Западниот Брег, окупиран од Израел.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Висок ирански функционер: Европските предлози се нереални

Висок ирански функционер ги оцени како нереални предлозите што европските сили ги претставија вчера во Женева.
Во изјава за новинската агенција „Ројтерс“, официјалниот претставник рече дека нула збогатување ураниум – што британскиот министер Дејвид Лами вчера го опиша како „почетна точка“ за разговорите со Техеран – е ќорсокак.
Тој нагласи дека инсистирањето на такви позиции нема да ги зближи Иран и Европа, додавајќи дека неговата земја нема да преговара за нејзините одбранбени способности, вклучително и за ракетната програма.
„Во секој случај, Иран ќе ги разгледа европските предлози во Техеран и ќе ги претстави своите одговори на следниот состанок“, рече претставникот.
Свет
Макрон: Иран никогаш не смее да добие нуклеарно оружје

Францускиот претседател Емануел Макрон денеска дека телефонски разговарал со неговиот ирански колега Масуд Пезешкијан, нагласувајќи дека Иран никогаш не смее да има нуклеарно оружје.
Макрон рече дека добил телефонски повик од Пезешкјан и дека се согласиле да ги забрзаат преговорите меѓу европските сили и Иран за неговата спорна нуклеарна програма.
„Барам: Иран никогаш не смее да добие нуклеарно оружје и од него зависи да ги обезбеди сите гаранции дека неговите намери се мирни“, рече Макрон на „Икс“.
„Убеден сум дека има излез од војната и дека може да се избегнат поголеми опасности“, додаде тој.
Министрите за надворешни работи на три земји, Германија, Франција и Велика Британија и високата претставничка на ЕУ за надворешна политика и безбедност Каја Калас вчера во Женева разговараа со нивниот ирански колега Абас Аракчи, една недела по почетокот на израелските напади врз Иран.
Трите земји го повикаа Иран да продолжи со дипломатските напори, без да се чека крајот на конфликтот, за да се реши спорното прашање за неговата нуклеарна програма, но Техеран рече дека е подготвен да ја разгледа дипломатската рута само кога ќе биде запрена агресијата на Израел.
Свет
Израел објави снимка од ново оштетување на иранскиот нуклеарен објект во Исфахан

Израелската војска објави снимка на која се гледа оштетување на иранскиот нуклеарен објект во Исфахан по новите напади.
Споредувајќи ја таа снимка со сателитски снимки направени минатата недела од компанијата „Максар“, „Би-би-си Верифај“ откри дека новите удари оштетиле неколку згради во северниот дел на комплексот.
Во посебна изјава, израелските одбранбени сили (ИДФ) објавија дека цел биле „производствени капацитети за центрифуги“ што се користат во процесот на збогатување ураниум.
Новата штета опфаќа површина од околу 0,3 квадратни километри, во чии рамки седум згради се чини дека се целосно срамнети со земја.
Снимката на „Максар“, направена на 14 јуни, покажува јасни оштетувања на најмалку две згради во различни делови на комплексот, како и траги од горење на периферијата. Во тој момент ниту една зграда не беше целосно уништена.
Вчера директорот на Меѓународната агенција за атомска енергија (МААЕ), Рафаел Гроси, во Советот за безбедност на ОН изјави дека „нападите врз нуклеарните постројки во Исламската Република Иран предизвикуваат сериозно влошување на нуклеарната безбедност во Иран“.