Битка со високите цени: Ценовниците на маркетите стануваат достапни на интернет

Денеска стапи на сила обврската за трговците на дневна основа да ги објавуваат малопродажните цени на производите на нивните официјални веб – страници. Обврската произлегува од измените на Законот за заштита на потрошувачи што беа објавени во Службен весник на 4 март, а Министерството за економија изготви Правилник за начинот на објавување на цените на стоките.

Во Правилникот стои дека сите мали, средни и големи трговци кои вршат дејност трговија на мало согласно Националната класификација на дејностите имаат должност дневно да ги објавуваат цените на стоките кои ги пласираат на пазарот на својата веб-страница на јасен и достапен начин, преку посебен дел на веб-страницата на трговецот посветен на цените (Ценовник). Објавените цени треба да бидат достапни без потреба од регистрација или дополнителна најава.

Ажурирањето на цените треба да се врши секој ден до 10 часот, а во случај на ненамерна техничка грешка, трговецот е должен да ја коригира грешката во рок од 24 часа.

Доколку од страна на трговецот се нудат промотивни цени или попусти, на веб страницата треба да биде означена редовната цена, процентот или износот на намалувањето, како и времетраењето на промоцијата или попустот.

Според надлежните, со ваквиот начин на објавување на продажните цени ќе се обезбеди транспарентност, поголема конкурентност и намалување на цените.

Изземање од ваквата одлука вчера побараа од Здружението на приватни аптеки, според кое аптеките не треба да се третираат како обични трговци.

„Сакаме да потенцираме дека аптеките не се класични малопродажни објекти, туку здравствени установи на ниво на примарна здравствена заштита, каде работи лиценциран здравствен кадар, магистри по фармација и фармацевтски техничари. Нашата основна улога е да обезбедиме здравствена услуга и фармацевтска грижа за пациентите, преку издавање и советување за употреба на лекови, следење на терапијата и едукација на граѓаните, а не да вршиме трговија во класичната смисла, изјави Билјана Божиновска, член на Извршниот одбор на Здружението на приватни аптеки.

Одложување на обврската бараат од Стопанската комора на трговци на големо и мало. Според нив станува збор за комплексна и обемна материја и потребно им е време за приспособување. Повеќе време посебно им е потребно на малите трговците кои сè уште се во процес на адаптација, како од технички, така и од финансиски и кадровски аспект. На оваа тема ќе разговараат и со министерот за економија на состанокот кој според најавите ќе се одржи следната недела.

„Сметаме дека продолжувањето на рокот ќе претставува поддршка кон сите засегнати субјекти, но најмногу на оние на кои им е најпотребно, а тоа се малите стопанственици и ќе придонесе за инклузивен пристап во спроведувањето на политиките за дигитализација, со што ќе се овозможи посеопфатна и правично распоредена транзиција“, велат од Стопанската комора на трговци на големо и мало.

Во моментов нема коментари за веста. Биди прв да коментира...

Остави коментар