Пратеничката на Левица, Јована Мојсоска ги коментираше вчерашните одлуки на Кривичниот суд за трговијата со енергенси и нафтени деривати за злоупотреби во набавки на мазут и перење пари. Според неа, симптоматично е што едниот од обвинетите, Ратко Капушевски оди во притвор, додека сопственикот на Пуцко Петрол во куќен притвор. Прашува „која е разликата помеѓу Капушевски и Пуцко Петрол, што обвинителот го преиначи барањето за притвор во куќен притвор?“.
„Иначе со ОЈО-ГОКК, кое бара куќен притвор само за Пуцко, раководи куќниот пријател на Ахмети, Ислам АБАЗИ. Затоа од ДУИ функционер не смее да оди во притвор.
За 50 ќебапи и прозводство на лек од канабис луѓе лежат затвор. Ама за набавка на масло што го труе народот, ниту притвор не смее да се изрече. Со вакви одлуки, и таа 2% доверба во правосудството ви е многу“, објави пратеничката.
На Ратко Капушевски, Адриан Муча и Ерџан Сулкоски им е определен притвор, соопшти кривичниот суд во Скопје. Притворот е определен поради опасност од бегство и влијание врз сведоци. За Асмир Јахоски, сопственик на компанијата „Пуцко петрол“ судија на претходна постапка вчера одреди мерки домашен притвор.
Кривична пријава добија вкупно 13 лица, 11-мина се уапсени, еден е во бегство, друг во притвор. Се сомничат дека сториле кривични дела поврзани со увоз на сомнителни набавки на деривати кои нанеле огромна штета на животната средина, здравјето на луѓето, а преку фиктивни договори за позајмици направиле милионска штета.
-Нанеле штета на буџетот во износ од 167,5 милиони евра, соопштуваат од Обвинителството.